யுவராஜ் சிங் அதிரடி காட்டினால் yuvraj singh batting style

Cricket news
 ராஜ்கோட்: இந்தியா வந்துள்ள ஆஸ்திரேலிய அணி, ஒரு "டுவென்டி-20 , 7 ஒருநாள் போட்டிகள் கொண்ட தொடரில் பங்கேற்கிறது. "டுவென்டி-20 போட்டி இன்று ராஜ்கோட்டில் நடக்கிறது. இதில், யுவராஜ் சிங் அதிரடி காட்டினால், இந்திய அணி சுலப வெற்றி பெறலாம்.

இரண்டு மாத இடைவேளைக்கு பின் சர்வதேச போட்டிகளில் களமிறங்கும் இந்திய அணிக்கு துவக்க வீரர்களான ஷிகர் தவான், ரோகித் சர்மா நல்ல "பார்மில் இருப்பது பலம். சாம்பியன்ஸ் லீக் தொடரில் அசத்திய ரெய்னா, தனது சிறப்பான ஆட்டத்தை தொடர வேண்டும். "மிடில் ஆர்டரில் கோஹ்லி, ரவிந்திர ஜடேஜா, கேப்டன் தோனி கைகொடுக்கலாம். சமீபத்தில் நடந்த வெஸ்ட் இண்டீஸ் "ஏ மற்றும் சாலஞ்சர் தொடரில் அசத்திய யுவராஜ் மீண்டும் மிரட்டலாம். 

புவனேஷ்வர் அபாரம்:

பவுலிங்கில் அசத்த புவனேஷ்வர் குமார், இஷாந்த் சர்மா, வினய் குமார், முகமது ஷமி உள்ளிட்ட "வேகங்கள் உள்ளனர். இளம் உனத்கத் அறிமுக வீரராக இடம் பெற வாய்ப்பு உள்ளது. "சுழலில் அஷ்வின், அமித் மிஸ்ரா, ஜடேஜா சேர்ந்து விக்கெட் வேட்டை நடத்தலாம். 

பின்ச் அசத்தல்: 

மைக்கேல் கிளார்க் இல்லாமல் களமிறங்கும் ஆஸ்திரேலிய அணிக்கு பின்ச், ஹியுஸ் சிறந்த அடித்தளம் அமைக்கலாம். இவர்களுடன் அனுபவ வாட்சன், ஹாடின், கேப்டன் பெய்லி, இளம் மட்டின்சன் ஆகியோர் நம்பிக்கை அளிக்கின்றனர். கடைசி நேரத்தில் மேக்ஸ்வெல், ஹென்ரிக்ஸ் அதிரடியாக ரன்கள் சேர்ப்பது அவசியம்.

பவுலிங்கில் அனுபவ மிட்சல் ஜான்சன் தலைமையில் கூல்டர் நைல், ஹென்ரிக்ஸ், பால்க்னர் நம்பிக்கை அளிக்கின்றனர். "சுழலில் தோகர்டிக்கு "கம்பெனி இல்லாதது பின்னடைவு தான். 

ஆஸி., முன்னிலை 

* சர்வதேச "டுவென்டி-20 அரங்கில் இந்தியா, ஆஸ்திரேலியா அணிகள் இதுவரை 7 போட்டிகளில் மோதியுள்ளன. இதில் ஆஸ்திரேலியா அணி அதிகபட்சமாக 4 போட்டியிலும், இந்தியா 3 போட்டியிலும் வென்றுள்ளன. 

188

* ஆஸ்திரேலியாவுக்கு எதிராக கடந்த 2007ல் டர்பனில் நடந்த போட்டியில் இந்திய அணி அதிகபட்சமாக 5 விக்கெட்டுக்கு 188 ரன்கள் எடுத்துள்ளது. குறைந்தபட்சமாக 74 ரன்கள் (2010, மெல்போர்ன்) எடுத்தது. 

* 2010ல் பிரிட்ஜ்ஸ்டோனில் நடந்த போட்டியில் ஆஸ்திரேலிய அணி, அதிகபட்சமாக 5 விக்கெட்டுக்கு 184 ரன்கள் எடுத்தது. குறைந்தபட்சமாக 131 ரன்கள் (2012, மெல்போர்ன்) எடுத்தது. 

198

அதிக ரன்கள் எடுத்த வீரர்கள் பட்டியலில் இந்திய வீரர் காம்பிர் (7 போட்டி, 198 ரன்கள்) முதலிடத்தில் உள்ளார். இப்பட்டியலில் ஆஸ்திரேலியாவின் வார்னர் (168 ரன்கள்), இந்திய கேப்டன் தோனி (140) ஆகியோர் அடுத்த இரண்டு இடத்தில் உள்ளனர். 

* ஒரே போட்டியில் அதிக ரன்கள் எடுத்த வீரர்கள் பட்டியலில் இந்தியாவின் ரோகித் சர்மா (79*) முதலிடத்தில் உள்ளார். முன்னாள் ஆஸ்திரேலிய வீரர் பாண்டிங் (76), வார்னர் (72) ஆகியோர் அடுத்த இரண்டு இடங்களில் உள்ளனர். 

4 

அதிக விக்கெட் வீழ்த்தியவர் பட்டியலில் ஆஸ்திரேலிய வீரர் வாட்சன் (2 போட்டி, 4 விக்கெட்) முதலித்தில் உள்ளார். இந்தியாவின் இர்பான் பதான் (4 விக்கெட்), ஆஸ்திரேலியாவின் ஷான் டெயிட் (3 விக்கெட்) ஆகியோர் அடுத்த இரண்டு இடங்களில் உள்ளனர். 

ஆறு ஆண்டுகளுக்குப் பின்...

ஆஸ்திரேலிய அணி இந்தியா வரும் போதெல்லாம், பெரும்பாலும் "டுவென்டி-20 போட்டிகள் நடக்காது. கடந்த 2007, அக்., 20ல் இரு அணிகளும் மும்பையில் மோதின. இப்போட்டியில் இந்திய அணி 7 விக்கெட்டுகள் வித்தியாசத்தில் வென்றது. 

இதன் பின் ஆறு ஆண்டுகள் கழித்து, இன்று தான் இந்திய அணி சொந்தமண்ணில் ஆஸ்திரேலியாவுக்கு எதிரான "டுவென்டி-20 போட்டியில் களமிறங்குகிறது. 

நெருக்கடி இல்லை

இந்திய அணி கேப்டன் தோனி கூறுகையில்,"" நீண்ட இடைவெளிக்குப் பின் அணிக்கு திரும்பும் வீரருக்கு, ஒருவித நெருக்கடி இருப்பது சகஜம் தான். அவர், பெரிய "மேட்ச் வின்னராக இருக்கும் நிலையில், இது ஒரு பொருட்டே அல்ல. இதற்கேற்ப, அவருக்கு அதிக நெருக்கடி இல்லாமல் பார்த்துக் கொள்ள முயற்சிப்போம், என்றார்.

மழை வருமா

இன்று போட்டி நடக்கும் ராஜ்கோட்டில், வானம் மேகமூட்டமாக காணப்படும். இன்று பகல் மற்றும் இரவில் இடியுடன் கூடிய மழை வர, 70 சதவீதம் வாய்ப்புள்ளது.

இன்று புதிய சீருடை

இந்திய அணி வீரர்களுக்கு இன்று முதல் புதிய சீருடை அறிமுகம் செய்யப்படுகிறது. வழக்கமானதை விட, சற்று கூடுதல் நீல நிறத்துடன் காணப்படும். இது, வீணான பிளாஸ்டிக் பாட்டில்களில் இருந்து மறுசுழற்சி முறையில் தயாரிக்கப்பட்ட "பாலியெஸ்டரால் தயாரிக்கப்பட்டது. மிகவும் எடை குறைவாக இருக்கும். விளையாட்டு பொருட்கள் தயாரிக்கும் "நைக் நிறுவனத்துடன், இந்திய கிரிக்கெட் போர்டு (பி.சி.சி.ஐ.,) இணைந்து, இந்த சீருடையை சமீபத்தில் வெளியிட்டது. 

ரேடியோவில் கேட்கலாம்

இந்திய, ஆஸ்திரேலியா மோதும் போட்டிகளின் நேரடி வர்ணனை, அகில இந்திய ரேடியோவில் ஒலிபரப்பப்படுகிறது. "டுவென்டி-20 போட்டிக்கு இரவு 7.00 மணிக்கும், ஒருநாள் போட்டிக்கு மதியம் 1.00 மணிக்கும் வர்ணனை துவங்கும்.